صورة وشعر ....

يا الله ياللي تعلـم السـر الدفيـن
اللي يتصـدّد منْـه حتـى قايلـه

يا رب تهديني وبالحبـل المتيـن
جوّد إيديني عـن سمـوم القايلـه

وتعيذني من عرضه ابليس اللعيـن
اللـي لخلقـك ناصـبٍ حبايـلـه

وإنك توفقنـي ولأحوالـي تعيـن
أنت الذي لا ضقت قمـت أخايلـه

لا ضاعت الحيله عليّه يـا معيـن
ما غيرك أحـد بالوجـود أسايلـه

مالي غنى عنّك وضعفي مستكيـن
وإنت الجدير اللي يبث شكاي لـه

مرات أحس إني بهالدينـا حزيـن
ويضيق صدري لين أصبّ بكاي له

وتاخذني الذكرى ونسمات الحنيـن
للي غـدت دنيـاه فـي رحايلـه

أبوي وأصحابي وكـل المسلميـن
ومن كان قبـره صفّقـت نثايلـه

هنا عرفت إن الأجل لازم يحيـن
وإن البقـى للـي علـي فضايلـه

ولو هي تدوم إن كان دامت للذهين
اللـي يمـرر بالخفـى عمايـلـه

لكنهـا فيّـة عصـر للمبصريـن
اللـي لهـم بالعلـم قـوه هايلـه

والهقوه اللّي مـا يلقّحهـا الفطيـن
تبقى على طول المسافـة حايلـه

حاولت أزينها وعيّـت لا تزيـن
والوقت عمره مـا يعـدل المايلـه

والصاحب اللي لا بغيته ما يبيـن
وليـا زهمتـه قافـلٍ موبايـلـه

هذاك خلـه لا يسـار ولا يميـن
وكبّـه إذا إنـك للشدايـد شايلـه

ويالعبد مالك غير صوم وركعتيـن
وإلا تـرى الدنيـا حيـاةٍ زايلـه

ومالك عن اللي منكتب لك بالجبين
واللي مهو مكتـوب منـت بنايلـه

والعمر رحله والمسافات السنيـن
والعبد موتـه لـو يعمّـر جايلـه

مير اعبد الله ليـن يأتيـك اليقيـن
وشيٍ مهو مكتوب منـت بطايلـه





يا طير يا طير يا طير السعد ياللـي تـرف الجنـاح
لا واهنيـك ليـا ضاقـت عليـك الارض خليتـهـا

وان رحت وان جيت ياطير السعد تسبق هبوب الرياح
واظن ما فيه ديره فـوق وجـه الارض مـا جيتهـا

مانته بمثلي تجي وتروح ما يصعب عليـك المـراح
لكـن ياليـت جنحانـك معـي يـا طيـر ياليتهـا

كله على شان ازور اللي رمانـي بالعنـا واستـراح
اللـي علـى شانـه الاقـدام عنتـنـي وعنيتـهـا

في ماضي الايام اشوفه قدم عيني في المسا والصباح
واليوم حتى العلوم اللي تجيني عنـه مـا اوحيتهـا

وليا نشدت العرب ماحـد يعلمنـي عنـه ويـن راح
واتعبت نفسـي وبالنشـده كثيـر النـاس بذيتهـا

لا ووجودي علـى شوفتـك مـره ياظبـي البـراح
ياللي على شانـك العبـره علـى الخديـن هليتهـا

يابو عيون هدبهـا يـزرق العشـاق زرق الرمـاح
ذبحت روحي على كفـك برمـش العيـن واحييتهـا



لو كل من يغزي يجيب المكاسيب
كلن غزا فاليوم سبعين مره

والمرجله تبغي حقوق ومواجيب
وراسن عيونه لسماء والمجره

الطيب صيده والنشاما مخاليب
والحر الاشقر فرصته ماتغره

الى طلع طلعه على الجود والطيب
عسى يمينه ماتجيها المضره




يا بنت انا للشـمس في جلدي حروق..
وعـلى سـمـوم القـيظ تزهـر حـياتي..

أطـرد سـراب اللال في مـرتع النـوق..
و من الظـمـا يجـرح لـسـاني لهـاتي..

عاري جـسـد والليـل هـتان و بـروق..
دفـاي انـا والبـرد.. سـمـل الـعـبـاتي..

ان عـذربوني بعـض خلانـك صـدوق..
يا بنت ا نا عـشق الخـلا من صفاتي..

أنا بـدوي.. ثوبي على المتن مشقوق..
مـثل الجـبال السـمـر صـبـري ثبـاتي..

ومثل النخـيل اخـلقت انا هـامتي فـوق..
ماأعتدت انا احني قامتي الا فصلاتي..

والا أفـتخـر بـفعـال يمـنـاه مخـلـوق..
يا بنـت ا نا فـعـلي شـهـوده اعـداتـي..

الله خـلقـني وكـلمة ا لحـق بوفـوق..
وملكت الأرض وراس مالي عصاتي..



الطيب بيّن والـردى ماهـو يسـر
ومدح الرجل ويش من يمينه حصلي

احد(ن) على ربعه كما وصف المطر
غيث لهم يـوم السمـاء ماتهملـي

على ربوعه كنه الغصـن الخضـر
والآ البحر اللـي يشـل المحملـي

ولاكبرت الدعوى مع ربعـه هـدر
مثل الجمال اللـي تشـل المنقلـي

هذا سلامي له علـى خشمـه قـدر
يستاهل العليـا حصـان يصهلـي

اطعن وغيرك ينشرون الـك الخبـر
وكلآ علـى طيبـه وفعلـه ينفلـي

الطيب يبقى مثل نقش في الصخـر
في صفحة التاريـخ دوم مسجلـي

والآ الردي عسى حياته فـي دهـر
وعسى دياره فـي حياتـه تمحلـي

لا نافع نفسـه ولا حـاش الفخـر
ويش ينبغى به جعل روحه تذبلـي

شكله عسى ربي يقصر في العمـر
وعسى عروسه فيـه تلقـا مبدلـي

يابنت شومي للرجال اهـل الظفـر
وكبي ردي الخـال ماهـو يجملـي

حتى عيالك ينفعونـك فـي الكبـر
في مقبـل الايـام يشفيـك الشلـي

هذي علومي قلتهـا وجهـة نظـر
وعديتها للـي فهـم فـي مزملـي

والشرح شفي اقصره في مختصـر
والهرج خيـره وزبدتـه مايطولـي




ترفعني النفس العزيزه والاخلاق
اللي بها اكابر وفاخر وماري

في بيت قرم للمواجيب عشاق
زكن عليهم والكرامه اجباري

هذي الحياه اللي لها شف واشواق
ماهي حياه مطاولين العزاري



مابين غلطات الزمـن والمطافيـق
خذيت من كبـوات غيـري دليلـه

اتعب علي عرف الرجال المطاليق
اهل الوفا مـن كـل بـد وقبيلـه

اهل الادب والدين واهل المواثيـق
اللي مشت بالعدل عن كـل ميلـه

والاالردي لويقرن الضحك تصفيق
مذموم بلسـان الوفـا والفضيلـه

ناس خذت علمه علي غير توثيـق
تكذب وتلقاله صدى مـن عميلـه

اللي تبيع الهرج جملـه وتفريـق
محصولهم علـم النـدم والفشيلـه



أحب الخليّ الخاليه والخـويّ القـرم
وأحب الفياض وشبة النـار والدلـه

وأحب الشجاعه والكرم والرفيق الشهم
ومجلس تراحيبٍ هل الطيـب تندلـه

وأحب الرجال أهل الوفا والنقا والحلم
على الدين والعادات ما تخلف المِلـه



اول حياة الفتى مشوار وعساسه
مسيرة ٍ في عجاج الوقت يقطعها

وثاني حياة الفتى تدريب ودراسه
تكثر هموم الحياة وينشغل معها

وثالث حياة الفتى يرجع على ساسه
النقطة اللي بدا منها يراجعها

ياصل لسن الهرم ويضيّع الطاسه
يزحف مع الارض ويخطط شوارعها

اليا تلاقت كتوفه وانحنى راسه
ضاعت جميع العلوم اللي مجمعها





مشـكـلـة الحـيـاة تـولـد لـنـا((الآيـام))
ومشـكـلـة الآيـام تـ ع ـطـينـا((الـذكـريات))
ومـشـكـلة الـذـكـريـات تـ ع ـيـشـنا بـ((ـهموم))
ومـشـكلة الهـمـوم صــ ع ــب((نـنسـاها))