شمالك ياوطن

شمالك ياوطن
شمالك ياوطن ليش انته مو كشاخ
كَضّيت العمر بهدومك الوصخه
أصفن شوف جارك وِلّده شيلبسون
يل عندك فلوس تجيب ابو الكشخه
لاتبني واكَولن حقـــــــــــــــك ومعذور
بتراب الشغــــــل هندامك إموصخه
اشو نفس الخرايب ماكو أي تغيير
بل اكثر بعد كَـاعك صفت صبخه
لأن جارك التركي عليك سد الماي
من شافاك ساكـــــت ما إلك صرخه
وعجيبه اشغيرك وانته العراق شبيك
ماريدك اتطكَـــــــــــــــــه إمبارك الزمخه
.........................
بت عمك دبي ماعجبتك فديوم
وهــــــــــيه معدله ومن الحِسن آيه
ولايه مسنعه ومحشومه من العيب
وعليهه تلوك كلش كلمة اولايه
إذا تخطبهه رايد كَلي تقنع بيك
وانته مبهذل وما عندك إحجايه
لَتكَلي جنت وإتكَلب التاريخ
تاريخك إتنكَعه وتشرب إبمايه
........................
لإن سومر وبابل مايسدن جوع
ولا عريان بيهن ينستر حاله
ولا تكَدر مفاخر ثورة العشرين
تطرد إحتلال العلـــــــــــــم والآله
كلشي بوكت جان الفاله والمكوار
هسه السمجه لبست درع للفاله
عذرا ياوطن ما اقصد استهزاء
بس احنه بزمان اختلفت احواله
زمن يحتاج ثوره إعله الجهل والعوز
وبفضله الشعب تتحقق آمـــــــــــاله
...................
دَ كوم الحكَـ زمانك ياعراق الخير
حط ايدك بدينه وتوكَف إنريدك
خاطر من تجيلك فرصة التغيير
ماتنوخذ غفله الفرصه من ايدك
عيدك منتظر واكَـفلك إعله الباب
فك بابك بعد مشتاكَلك عيدك
ماترهم إسنينك دوم لطميات
خلي إويه اللطم فرصه المواليدك