كل عقلك فرح تلكة بحلك بيه ناي

كل عقلك فرح تلكة بحلك بيه ناي

كل عقلك فرح تلكة بحلك بيه ناي
من تلمح عيوني راح تلكه الرد

شترجـى من المكابر غير طاري الموت
ومابيها المشانق غير حل وشـــد

صدكت الحجي واملت بيك احلام
لكن مالكيتك لمن صار الجــــد

انا ردتك تجيني بوكت بيه شمات
جنت اسمع حجيهم من امر يشتـــد

الى ان ايسو منك ذروني ارتاح
لكو غيرك وغيري والحديث نسد

تجي هسه شبعد قصرت لو ماجاي
وين الكه الشماته حتى اكلهم رد
الك يد بحياتي اعترف ماناسيك
بس انته مماتي هم الك بيه يـــد

انا ردتك تجي الساف الوكع تبنيه
هسه الساف خله بس اساسه نهـــد

حجر عثره الجرح حطيته كبل الروح
ومأمن بجيتك راح بيه تصطــــــــد

ولو حد بالبدايـــــــــــــه الك ماخليت
بس حاولت تالي ردت احطلك حــــــد

تريد شفاف تفرح انــــــي شرد انطيك
اريد افرح ولكن مستحي من الخـــــــد



غرك خدي دمع وشلت بيــــه مافاد
تصور فوك جفني ردت احطن ســد

جنت اسكت كبل لو هددتني تروح
اخاف تروح مني عن زعلتي ارتــــد

هسه انته رحت واني منخاف منين
انه تناسيت كلشي واعتبرتك نــــــد

شغير بيك كلبك مستحيل تصير
هو اللون الأسود يبقه لونه اسود

كلما جايني جاي اقتنع وانساك
وبكل امنياتي جاي احس ازهد

اله اسباب الزعل مو عن فراغ يصير
ماصار الجزر لو مايصير المـــــــــــــد

نفسهن ماجبت فد شي جديد وياك
ياجرح الاشوفه عندي منه شكـــــد

وعا بيك الورد شافك شتلت اسهام
نايم سوى روحه حتى لايشهــــد

واسال جفن عيني حتى ادينك بيه
عن لا يحجي اندسه بيها جنت ارمـــد

اشيل ضماد جرحي تريد لا مو هيج
انته اسالني الاول انه جرحي انشــــــــد

يستشري الحزن واستاصله كل يوم
الى ان اخبروني ان حزنك قــــد


وصل حاله بعد منك صعب ينشال
جروحك بيه مجلبه جذره بيها متـــد

كظة وكتك مثل ماخلص وكتي بيوم
وين تريد احطك باب كلبي نســـد

رذاذ العالورد صح ندى بس لوطاح
تتغير أوصافة مو ندى ينعـــــــد

بس يجوز اذا حـــرالشمس يجويه
يتبخر يجوز وللورد يصعــــــد

على ماشوف دمي ينكطع لو لا
من حرة اصوابي تنطفي وتبرد

زين انته بقة صوتي وراي وياك
انه من رحت عني مابقالي احـــد
موجرت مكص بس ماكو اثر جفين
جا بصمات ضلت لو بفعلت يـــــد

فرق يوسف برئ اتضح من تهموه
تقتعني قميصك من دبر ينقـــــد

يوسف من لبس جان القميص كدار
بس انته قميصك بيه زغر ماكــــد

اريد اقضي بجريمه ماكو بيها شهود
بس كلمته انساني والزعل والصـــد

عندي المشكله ابين الجرح والسيف
سيفك جرحي كلي ياهو منهم هـــــد

ول هذا انه كل ما اوصل انطي احكام
اكول الجلسه هسه ترفع للغــــــــد