الحبايه اللعينه

من طرف الاسكندر 16.08.11 16:13

السلام عليكم ,, اليوم اللي يصادف محد يا محد قصدي احد , راح احجيلكم واحد من اكثر الايام انشهارا بالكلية بالنسبة الي ,, اني بطبيعتي مو بس مكرش ,, مكرش و مطنش , يعني اغلس على هواية شغلات لان ما اعتبر نفسي جريء , ففديوم من الاياييم كلت لروحي بس بصوت ناصي حتى لحد يكول عليه يحجي وي روحة و اتخبل الولد ,, اني لازم يكون عندي بوي فريند , لحد يفتي بكيفة بس البوي قبل جان بنية معناها لان هاي القصة عتيكة كلش ,, اول ما طلع توسان معجون الطماطم تقريبا ,,

المهم ,, كلت اتعلم مصارعة , قصدي مصارحة و اجيت على بنية بيها حظ و بخت و اقرة براسها بلكت تنجذب اليه , ولو ما مقتنع كلش بفكرة تنجذب اي قابل راح اصارح بليتة لو حديدة هالدورة بدال ما تنجذب اتزنجر يسويها حظي, المهم اني هم نيشنت وحدة مفلطحة الوجه مقبولة الجهرة كلش كصيرة لدرجة فكرت اذا ضربتني بوري ادوسها و امشي ,, المهم ,, حجيت لصاحبي فكلي انتة تستحي فراح انطيك حباية تبلعها و تروح راسا ,اسد بمعنى الكلمة
- يعني من اروحلها اكلها غغغغغغغغغغغااااااااا
- شنو هذا؟
- زئير
- ابني يا زئير انتة مكبسل؟
- مو تكول اسد ؟
- ابني يعني قوي مسيطر
, ثاني يوم و اني دا اتدعبل فائتا لباب الكلية طلعت الحباية و جررب بلعتها ,شو ما احس غير باعراض جايتني قبل بغير مواضيع , حسيت ركية وكعت على كصتي من سطح عمارة ,صار عندي تسلخات بالبؤبؤ و صداع بجعب رجلي و حسيت واحد جوة معدتي كاعد يضربها جلاليق , و فصل عندي كلشي , اخر شي اتذكره انه واحد كلش سمين جان كدامي لدرجة فكرت ادك هورن و اتجاوزة من اليمنة , وراها شنو اللي صار محد يسالني لان لا اعلم طلاقا , شنو جانت هاي الحباية ما اعرف , كل اللي اتذكره من صحيت لابس الحذاء بيدي مسوي جفوف و تي سكوير مفوتة بالجيب مال بنطرون زارفة و مدندل لي جوة محورة سيف و واحد ديضرب بيه راشديات و يكلي اصحة اصحة ,,

شنو الفلم ما اعرف ,, اني شسويت و ليش هال الانقطاع المفاجيء بسلسلة نشاطاتي ما اعرف
اخذت صاحبي على صفحة on page و كتلة رحمة لفيفي عبدو ما اتكلي شنو السالفة ؟
صاحبي ضحك و ابتعد بعيدا و هو يهز بيده ,, زين اني شسويت لمن جنت مكبسل ؟ ماكو غير انه هاي الحباية جانت مال كبسلة ,, و اذا فد شوية الكة وحدة اييع الجهرة عملاقة الخشم يغطي 63 % من وجها , حنجها نازل يشتري جكاير من بطنها ووجها بي حب يفتح محل مال كرزات جتي كعدت بصفي
- هلاو فادي
- هلاو شلونج ؟؟؟ (اني مثل الخبل اللي نسيت انه اسمي مو فادي) اخبارج مشتاقلج شكو ماكو ,, اكول انتي منو ؟
- اني نانسي شبسرعة نسيت ؟
و كامت اتمطك علج من حلكها و تسوي نفخات و فتحت حلكها شفت سنونها المعوجة و المكسرة جنها جلاب صغيرة ,
- بابا يا نانسي انتي كل قوتج عجرم و من جان بالعسكرية يا نانسي ؟ يجوز اني نانسيها؟ قصدي ناسيها؟
- لك شبسرعة نسيت اني اللي صارحتني قبل نص ساعة و كتلي اموت عليج و قبل شوية دزيتلي بوسة بالهوة
اني بست هاي الصخلة؟ اكيد بستها و ردت احطها بصف الحايط
- اختي انتي متاكدة اني ؟ مو اني اشبه واحد ما اعرفه
حاولت اقنع بيها انه اني صح كبسلت بس مو اتخبلت حتى اصارح هيج بستوكة ماكو فايدة المهم كمت و انهزمت ,,
دخلت للقسم لكيت جماعتي كلها مبوزة بوجي هم ما عرفت شنو السالفة ,, تالي لكيت اعلان باسمي الحضور لرئاسة القسم مالتنة

فتت لكيت استاذ عدنة جابلي شوية داطلي و استكان بيبسي و كعد يشرحلي لجلاء غموض السالفة
- ابني,, انتة جيتنة اليوم خبلون الى درجة ,, اي نعم جيتنة سكران او مخبل (و هنا تذكرت الحباية مال صاحبي و تمنيت صاحبي جوة ايدي حتى ادحس الجواريب بحلكة اسوي عندة تعفن مزمن بعلباتة)
ابني انتة فتت للقسم نازع القميص و تهوس بالفانيلة و تهتف عاش الفراش عاش الفراش ,,, هيجي اللي ينظف القسم عاجبك الحجي ابو احمد مدا افتهم ؟ و شنو تريد شعبة ب تاخذها و تدفع سرقفلية و تفتح ورشة تصلح صالنصات بيها ؟ ادري قسم هو لو بالحي الصناعي كاعدين ؟؟ و بعدين ما لكيت غير دكتورة فخرية اخت العميد اتصارحها ؟؟ مرة عمرها قريب ال 60 صحتها و انطيتها شيش حياكة ملزوك بي دب ؟ هية هاي سواية يا ابني فضحتنة ,, روح ابني انتة مفصول من العراق كله مو بس هنا و الله يعينك

و هكذا انفصلت مع انه اني كلشي ما مسوي ,, و لهذا السبب رحت لموزمبيق و درست بكلية الحدايق تخصص ضرب دالغات و جبت شهادة و جيت و الله لا ايعوزني عليهم ,,

من طرف **أبو مريم** 16.08.11 20:07

عاشت أيدك على هذا التحشيش
ينقل لقسمه

الحبايه اللعينه 3685882489

الحبايه اللعينه

الحبايه اللعينه

رد: الحبايه اللعينه