الهلاااااااااااااااااااااااااااااااو

السلام عليكم ,, اكثر شغلتين تعجبني بهذا الكوكب ,, الداطلي و الهلاااااااااااااااااااااو مال بنات ,, الهلاو مال بنات كلش طويلة ,, يعني لا مانع , و طبيعي جدا , و عادي كلش , لمن بنية تكول لبنية اخرى الصبح هلااااااااااااااااااااااااااااااااااااااااااااو ذيج اتجاوبها تصبحين على خير فوزية مثلا , لان الهلاو مالتها 4 ساعات و نيّف (نيّف زين مادام اكو مي حار) ,, مرة بنية بالكلية كلتلي هلاااو خلصت بيها جكارتين ,, مع انه احنة الولد نكول هلو و نفتح موضوع و نتعارك و نضرب نص باكيت كنت طويل ما ادري ببيش سعره هسة جان ب 2 و نص ,, و كل هذا ب 10 دقايق ,, البنية تجي تكول هاللللللللاو تاخذ 12 كيكا من الهارد ,,,

حاولت افيك بيها و امدها مثلهم ,, ابوية لحكني بالنعال و امي كامت اتصيحلي نيفين ,, بطلت ,,

حتى بالموبايل ,, اكو هلوات تسحب نص الرصيد ,, اتوقع زين و اسيا راح ينلزون عرض كول هلاو كصيرة و ووفر 200 دولار رصيد ,,
او مثلا "كارت هلاو" بدال كارت ابو ال 5000 ,, هذا تخليه لمن تكول بس هلو و وراها اتخلي كارت ابو ال 10 للحجي ,, مرة بنية بالموبايل كالت للخ هلاو من كملتها طلعلها battery low ..

يعني بصورة ادق لو نفرش الهلو مالتهم بالكاع يمكن نبقة نمشي عليها ساعة و 4 دقايق (حسب مقياس رختر)

و اكو مرات يلحنوها ,, يعني بيها بداية و صعدة و بعدين تخلص ,مرة سمعت هلللاو من بنيه كتلها دزيلياها بالبلوطوط عبالي مشغلة اغنية جديدة لمايا عجرم , يمكن نصرت البدر راح يغنيها فد يوم ,, هلااو 2011 من البوم الله يساعدكم ..

بس اكو قسم خاصة العصبيات يستعلمون هلو مغايرة تماما وية الولد ,, هلو هيج عال سريع عبالك ركية فوك راسها و بس تريد تخلص منها ,, مرة بنية كلتلي هلو سمعتها ووو كلت شجاها فلانة كامت تحجي كوري ,, كصيرة و سريعة كلش عبالك بكاية مو هلو ,,

و اخيرا هية الهلاو مال بنات دمها خفيف بس لا تطولوها هلكد لان جبيرة على اذانه