مغامرات الزواج

من طرف الاسكندر 21.08.11 16:15

السلام عليكم ,, او بمعنى اخر مرحبا ,, (مرحبا ثالثة مسائي) اليوم (اي قابل قبل اسبوع اصلا قبل اسبوع هيج وكت جنت نايم فد مرة) ,, المهم اليوم راح اجيلكم لمن حاولت ارتبطت بفتاة (اي بفتاة طبعا قابل ارتبط برجل عمتي) و فشلت - كالعادة - الشغلة لاسباب و شباج , قصدي لاسباب عبيطة كما هو موضح ليجوا :

امي اللي تصادف اللي ماخذها ابوية , و هي في ان واحد بمثابة والدتي ,, جفتت عليه بليلة ظلمة و اني جنت بغرفتي (اي اي عندي غرفة اي قابل انام بالطرمة و رابطيني بالميزانية بحبل) و كلتلي

- ابني
شبني يوم ما عندي طابوك بعدين البناء غالي اتصوري لملوم بنة سياج بنص غرفته ما اعرف شيصخم بي و كلفة دفتر ابو ال 60 و
- ابني بلا خبال اسمعني انتة كبرت و لازم تتزوج عاد اكو بنية اتداوم بالصيدلية روح شوفها
- ليش عارضيها للشوف ؟ شنو ما مشيوفة قبل (مشيوفة شنو) و ببيش البوعة ؟
- ابني لا اتخبلني اكو بنية حبابة مؤدبة روح شوفها و احجي وياها بلكت تعجبك
- يا موديل ؟
- شنو ؟
- شكد عمرها ؟
- مواليد 82
- ما اتزوجها
- ليش ابني ؟
- ال 82 تبريدها خرافي اخاف انشل
- امشي اطلع برة
- انتي بغرفتي وين اولي بعد

طبعا رحت للكلية اللي هي تعتبر الصيدلية كما اقتضت الامور ,, كلولي راح تلبس تنورة سودة و تيشرت ابيض و كاعدة وحدها على مصطبة ,حلو لمن تروح تقابل بنية و تعمبرلها عن مشاعرك اللي بعلباتك قصدي اللي بزردومك بصراحة ما اتذكر وين حطيتها بس المهم اكو مشاعر لازم تطلع برة ,زين هاي شلون اعرفها ؟ هاية؟ لالا هذا ابو النادي شصارح منه , احتمال هذيج اللي دا تمشي؟ و شبيها تعرج و شايلة صينية؟ عزة هاي الفراشة خاف اصارحها و تطلع انسة و الكة نفسي متزوجها يلا اشبع جاي ببلاش, اخر شي لكيت وحدة ينطبق عليها الشكل و المواصفات كاعدة وحدها دا تقرة و تتلفت و ذيل حصانها يكمز وراها , رحت و كعدت بصفها ,, شلون افتح وساها موضوع؟ هاي شلون شغلة
- بلا زحمة انتي منو ؟
- شنو ؟ (بنترة وعصبية)
عرفت البداية غلط و ارتبكت و حاولت بغير طريقة
- العفو قصدي اني منو ؟
- شنوو؟؟ (بعصبية اكبر و ياها طراااخ مال سدة كتاب جانت دا تقراه بعنف)
- لا العفو مو قصدي بس اريد افتح وياج موضوع ممكن؟
البنية استعدلت و اتغيرت ملامح وجهها و صارت اقل انخبالا ورة ما وصلت لقناعة انه راح تكمز اتعضني من ابطي
- اي اتفضل افتح موضوع
- عندج درنفيس ؟
- ليش؟
- نفتحة ثنيناتنة ؟ احسن
- هو شنوه ؟؟ (البنية مستغربة و حواجبها صارن هيج ^^ و ركبتها طولت ما اعرف ليش حسيتها راح اتزوع لبلبي عليه )
- الموضوع ,, او اكلج خل افتحه وحدي
و استعدلت و حاولت اتذكر كلمة من الحجي اللي جنت محضرة بس اتذكرت اخر جملة رحت كايلها راسا احسن مما ابقة ساكت
- و بعد هذاالحجي كلة من حقي اعرف رأيج
- لك انتة راح اتخبلني (و عيونها كامت ترمش بسرعة مما خلاني اتوقع انه البنية راح اتطير يمكن و اكعد اتلفت و اباوع فوك مثل المعتوه ادور عليها وين ولت) ,, لك هو انتة شحجيت حتى تعرف رايي
هاي شلون شغلة ,, ما دام ما حافظ الحجي و لا حافظ القاضي كلت أألف من عندي
- احم , مثل ما تعرفين احنة الكائنات الحية لازم نتكاثر و الا ناكل فجل , يعني كل كائن حي يختلف عن الجماد بطبيعة الحال يعني اني اختولوف اوختلاف جذرج عن قنونة الغاز مثلا لان القنونة مثلا اتنفس
- شنو؟؟ (البنية كام يطلع من عيونها شرار و من خشمها خنين بنفسجي مما يدل على نية وشيكي بضربي عجل)
- لا قصدي اني ما انفس و حتما لازم اتكاثر
- اي ما تتكاثر احد لازمك هاي شون شغلة يا ربي (و كامت تتلفت يمكن دا اتدور على بنية كصيرة تفشخني بيها)
- لا مو حتى اتكاثر لازم اكو طرف اخر و يصير برتباط
- منو ؟
- ياخة و رباط ,, لااع هم مو هاي ,, ارتباط ...و اني كلش يعجبني انه اذا سهلت الامور ارتبط بيق , قصدي بيج (بيج تجي بمعنى شاطئ بالانكليزي ولو هذا مو موضوعونة)
ما اتذكر شصار وراها ,, بس اللي نقلني للمستشفى كلي عجل ادى الى غيبوبة هو لو اني نازوكي لو صارحت بالغلط العكيد ابو شهاب , اخر وحدة شفتها قبل ما يغمة عليه مرة لخ امي و هية دا تبجي و اتكلي

- لك ابني اي غير تسالها انتي فلانة لو لا ؟؟ اللي كتلك عليها اصلا ما جانت مداومة هذاك اليوم ,,!!

يلا الى اللقاء بغيبوبة اخرى