عراقي يخاطب ملك الموت

من طرف **عدنان عباس** 19.06.11 22:46

يا ملك الموت

خلصنة بعد... ماظل شي ننطيك

ياملك الموت ظلت بس قصيدة...

بيهة المطلع يسولف على الموت

و إجة سهم المفخخ حز وريده...

تعذرنة ترة ما باقي بالبيت

آخــــــــر طفل لفوه بجريـــده....

شسولفلك علينة؟؟ بعينـك تشوف

دمعة تموت و تخضر جديــــــــدة...

نفس مأساتنه ونفـــــــس المعاناة

و الخلص امس باجــــــر نعيـــده...

احنة من المهــــد ما زارنــــه العيـد

وكالـــوا عيدكــــم مقفـــولة ايــــده...

جذبنــــه ونطرنـــــه بطرك العيــــون

و إجه العيــد بــعلم ملفـــوف عيـــده...

وعلى العبـــوة كعدنة و جنــــة صيـام

وفطرنــــه اعله بـــــــارود الحديـــدة...

نخابــــر عالنصر ..بـس ما يدك ليـــش؟؟

اثاري الدم فشـــل...خلص رصيــــده...

يا عمـــي ولا نريــد..الشعـــب قانـــع

بس سدولنــــه حلـــــوك المدافـــع...

وشوفــــوا بيـوت اهلنه بغيــر بـيـبان

وملـك المــوت بـيهن طــاب طالـــــع...

الدول تحفر ذهب وتصفــي بتـــــــرول

و احنة شحجى الســــاتر والمواضــــع...

على متـــون الشــوارع ذبحــوا اليـــاس

وزرعنه ارواح خضـــرة اعله الشــوارع...

على شاشات العرض شرونه الانذال

و عالانترنيــــت خلونــــة مقــــــــاطع...

مقطــــــــع طفلة تبجي ولازمة الباب

تطــر كلب السمــة من تصيــــح طالع

بابا وكال ارجع...مــــــارجع ليـــــش؟؟

ولهسة بإذنـــي صرخة بابا راجــــــع...

جا يمتــــة تجي؟ خافــــــن يجي العيد

و اظل اعله الفـــرح بعيونــــــــي اباوع...

ومقطع للمفخـــــخ.. مقطـــــع اعدام

مقطع ذبـــــــح من سيــــــــاف بارع...

ماظـــــل شي بعـــد ما شـــافته العين
اذا حتـــى العيــن ملـــت تبــــــــــاوع